يسقط .. يسقط حكم العسكر

مع المجلس العسكري؟

ضد الثوار؟

طيب شوف وجهة نظري لأني ضد حكم المجلس العسكري و مع الثوار.

(1)

سيادة المشير طنطاوي قائد قوات حرس الجمهوري من 1988، ثم قائداً عاما للقوات المسلحة ووزيراً للدفاع من 1991

, يعني فضل 23 سنة بالقرب من مبارك, والمتعارف عليه إن التعيين في زمن مبارك كان بالولاء, طيب نرجع بالزمن و نتكلم عن محمد عبد الحليم أبو غزالة وزير الدفاع الأسبق وتم تعيينه وزيراً للدفاع والإنتاج الحربي وقائداً عاماً للقوات المسلحة سنة1981،و تم اقالتهُ من منصبه عام 1989واعتبر الكثيرين القرار وقتها مفاجئاً وفسره البعض على أن الغرض منه التخلص منه لتزايد شعبيته في الجيش وتخوف مبارك من أن يقوم بانقلاب عسكري ضده ولأن أمريكا اعترضت عليه لذلك أقالهُ, ثم جاء الفريق يوسف صبري أبو طالب و هو وزير الدفاع من 1989 حتى 1991.. و تمت اقالته أو قدم استقالته بعد حرب الخليج مباشرة.و كل ده يوضح إن طنطاوي فضل 20 سنة وزير دفاع كان بسبب الولاء و الطاعة من جانبه لمبارك.بعد ده كله تتوقع منه ايه؟

ضحك علينا في الأول و قال إنه حمى الثورة و رفض طلب باطلاق النيران و جه في شهادة المحكمة قال إنه ماجالوش أي أمر باطلاق النار!

بكل بساطة كان الحل الوحيد إن مبارك يتنحى و هو يلعب اللعبة دي لغاية ما يظبط ورقه و ورق مبارك و مبارك هيطلع براءة و هو هيبقى ف السليم و الثوار يطلعوا عملا و خونة و كل حاجة تبقى تمام. لازم نعرف كمان إن المعونة الأمريكية العسكرية اللي بتروح لوزارة الدفاع 1.3 مليار دولار معونة عسكرية سنوياً و دي بدأنا ناخدها من سنة 1979 بعد اتفاقية السلام و من تقرير المحاسبة الحكومية اللي بيبقى من الكونجرس أكدت الولايات المتحدة قدمت لمصر حوالي 7.3 مليار دولار بين عامي 1999 و2005 في إطار برنامج مساعدات التمويل العسكري الأجنبي، وأن مصر أنفقت خلال نفس الفترة حوالي نصف المبلغ، أي 3.8 مليار دولار لشراء معدات عسكرية ثقيلة, الفكرة بقى إن صفقات السلاح و العمولة و السرقة كانت بتبقى بين مبارك و طنطاوي و المجلس العسكري كان بينوبه من الحب جانب و طبعا معروف إن قبل تنحي مبارك إنه كان القائد الأعلى للقوات المسلحة و كان ولاءهم ليه برضه!

حد يعتقد إن ولائهم اتغير و بقى للشعب مثلاً؟؟

(2)

طنطاوي و المجلس العسكري أول مامسكوا الُسلطة قالوا إننا هنسلم السُلطة في غضون 6 شهور.. مش احنا اللي قولنا على فكرة هما اللي حددوا و قالوا ده, بعد كده دخلونا في متاهة الاستفتاء و متاهات تانية كتير و فضلوا في السُلطة .. ممكن تقارنوا بين مصر و تونس , على فكرة في تونس عملوا الدستور و خلصوا انتخابات البرلمان و اختاروا الرئيس و بقوا دولة طبيعية و الجيش هناك هو اللي يطلق عليه حمى الثورة فعلاً.

(3)

المغالطات الدائمة إن الثوار دول ممولين من بره و طلع اللواء الرويني قال إن حركة 6 أبريل بياخدوا تمويل من بره وطلع المجلس العسكري بيان رقم 69 بيقول إن في فتنة تسعى إليها حركة 6 أبريل , بعد كده لما لاقوا إن الطريقة دي مفضوحة و سهل جداً اثبات كذبهم راحو خلوا شوية الشيوخ بتوعهم و شوية الإعلاميين اللي تبعهم و كان نصهم حزب وطني إنهم يشككوا الناس في بعض, دول ممولين من قطر و دول من السعودية و دول ادربوا في صربيا و دول علمانين و كفرة أما دول فإسلاميين وهابيين و ابتدينا نتخانق مع بعض و المجلس العسكري طبعاً كان فرحان بينا خصوصاً لما الإسلاميين خدوا أغلب مجلس الشعب ففكوا ايدهم من الثوار بس ده مايمنعش إن بعيداً عن قيادات الإسلاميين فولادهم في منهم كتير مع الثوار, و ابتدا الناس اللي قاعدة أودام التلفزيون يحصلهم تشويش و يقرفوا , و نتسأل هو انتوا عايزين ايه؟

تخربوا البلد؟

طيب هو احنا ماسكين البلد أصلاً؟؟

(4)

البورصة تخسر و ماعندناش فائض و مش هنلاقي ناكل, طيب المحاكمات مش شغالة ليه تجيبلنا فلوسنا المسروقة؟ و البورصة بكل بساطة وقت ما بيحبوا يوقعوها أو يعلوها بيلعبوا بالسندات الحكومية عشان يقنعونا بوجهة نظر واحدة, خليكم حلوين و سيبونا هتلاقوا تاكلوا غير كده ف البلد هتتحرق و تقع. و لو إن ولادنا اللي بتموت أغلى من كل حاجة لأن مفيش وطن من غير شعب, لكن باضطر غصبن عني أتكلم بطريقة بعيدة عن فكرة الكرامة و الحرية, لأن الواقع بيقول إن الأمان و رغيف العيش أغلى عند ناس كتير من فكرة الكرامة للأسف.

(5)

مخطط الفوضى و مخططات التخريب, كلام بيتعمل دايماً في أي نظام قمعي, يقول للشعب إنتا مهدد فيخاف و يكش و يكن ف البيت, طيب عندك مخابرات عامة و مخابرات عسكرية و أمن قومي و مش عارف ايه, و جاي تقولي أنا الشعب اتصرف؟؟؟

أومال بتاخد فلوس ضرايبنا و بتقبض مرتبك على ايه؟ عشان تضحك عليا و تهددني و تسحلني و تضربنا بالرصاص الحي من فلوسنا؟؟

(6)

عايزين المجلس العسكري يمشي و نبقى في فوضى؟ مين قال إننا هنبقى في فوضى؟ في انتخابات رياسة و هتنزلوا تختاروا اللي عايزينه بكل بساطة.

عايزين تدمروا الجيش؟ ندمره ليه؟ ماهو هيرجع ثكناته و يرجع لوظيفته الأصلية حماية حدودنا .. المجلس العسكري و الجيش مالهمش في السياسة بكل بساطة.

(7)

أنا مش أم لكن كل ماباشوف بنات و ولاد صغيرين بيموتوا و يتسحلوا و ينتهكوا عشان هما عايزين البلد دي أحسن من كده قلبي بيتحرق عليهم, و لما باشوف الناس بتشتم فيهم إنهم بلطجية و صيع و مش متربيين بيبقى هاين عليا أقطع اللي بيتكلم من حرقة قلبي عليهم بس باسكت و بادعي ربنا يُظهر الحق.

(8)

- قد يبلغ فعل الاستبداد بالأمة أن يحوِّل ميلها الطبيعي من طلب الترقّي إلى التسفُّل، بحيث لو دُفِعَت إلى الرِّفعة لأبت وتألَّمت كما يتألَّم الأجهر من النور، وإذا أُلزِمَت بالحرية تشقى، وربما تفنى كالبهائم الأهلية إذا أُطلِق سراحها. عندئذٍ يصير الاستبداد كالعلق يطيب له المقام على امتصاص دم الأمة.

- الحكومة المستبدّة تكون طبعاً مستبدّة في كل فروعها من المستبدّ الأعظم إلى الشرطي، إلى الفرّاش، إلى كنائس الشوارع، ولا يكون كلُّ صنفٍ إلا من أسفل أهل طبقته أخلاقاً، لأن الأسافل لا يهمهم طبعاً الكرامة وحسن السمعة، إنما غاية مسعاهم أن يبرهنوا لمخدوهم بأنهم على شاكلته، وأنصار لدولته، وشرهون لأكل السقطات من أيٍّ كان ولو بشراً أم خنازير، آبائهم أم أعدائهم، وبهذا يأمنهم المستبدُّ ويأمنونه فيشاركهم ويشاركونه.

من كتاب طبائع الاستبداد و مصارع الاستعباد لــ عبد الرحمن الكواكبي

(9)

بسم الله الرحمن الرحيم

قال تعالى : وَلا تَرْكَنُوا إِلَى الَّذِينَ ظَلَمُوا فَتَمَسَّكُمْ النَّارُ وَمَا لَكُمْ مِنْ دُونِ اللَّهِ مِنْ أَوْلِيَاءَ ثُمَّ لا تُنصَرُونَ(هود:113)

قال تعالى : وَسَيَعْلَمُ الَّذِينَ ظَلَمُوا أَيَّ مُنقَلَبٍ يَنقَلِبُونَ (الشعراء:227)

صدق الله العظيم

***

"رَأَيْتَ يَا رَبُّ ظُلْمِي. أَقِمْ دَعْوَايَ" (سفر مراثي إرميا 3: 59)

***

لا تستوحشوا طريق الحق لقلة سالكيه ..(علي بن أبي طالب)

(10)

اللهم إني أشكو إليكَ ضعفي وقلة حيلتي وهواني على الناس يارب العالمين.

***

يسقط .. يسقط حكم العسكر