18 أكتوبر 2012

حكاية تاريخ صلاحيتها انتهى





في يوم كنت مع صحابي وقابلته, كنت أول مرة أشوفه ع الرغم إننا كنا بنرد على بعض في الحياة الإفتراضية دايماً..قعدنا ورغينا يومها ..واحنا مروحين حكالي إن بنته كل طلباتها من الحياة هي الجيلي كولا وضحك وقالي "ودي ألاقيها فين؟" ضحكت وعند أول كشك قولتله "أهو في جيلي كولا, هاتلها بقى!" 

اشترى لبنته وإداني كيس.. الكيس ده فضلت شيلاه تلات سنين بس بقى معاه تذاكر سينما ومسرح وأوبرا وشوية وجع!
حاجات كتير بقت بينّا و زي كل الأفلام القديمة حكالي السيناريو الشهير "أصل أنا ومراتي مش متفقين بس عايشين مع بعض عشان نربي البنت" .. و زي كل بطلات الأفلام الأبيض وأسود الهُبل ..صدقته!
بس بعد تلات سنين اكتشفت إني استحملت حكاية مضفرة بـ وجع و شك و غيرة وإنّي مابقاش عندي ثقة في نفسي..
من يوم ما إداني كيس الجيلي كولا و هو خد روحي وبنى حواليها سور .. بس جيت في يوم معتاد جداً من أيام اتهاماته ليا و رحت مشيــــــت.. اللي يضحك إنه راح قال لصديقة مشتركة بينّا "مش فاهم إيه اللي حصل؟؟ غلطت فيها وكنت عصبي, طيب مش هديت بعدها بيوم ولا يومين ولا حتى أسبوع؟ مارجعتش كلمتني ليه؟!!"
ساعتها رديت على صاحبتي ونا باضحك و قلتلها "أصلي كلت كيس الجيلي الكولا و خلصت الحكاية, مشيت وكل الوجع اتحبس فـ الماضي ورايا , وعدلت وشي عشان رقبتي ماتوجعنيش من البص لورا"
يمكن كل مشكلتي اللي محيراني بجد إني بعد ما كلت الجيلي كولا و رميت الكيس ماقدرتش أعرف هو كيس الجيلي كولا كان لسا تاريخ صلاحيته ماانتهاش؟!

*******

شكر خاص مرة تانية لـ سلاّم يسري و ورشة الحكي معاه